پیارے اسلامی بھائیو ! اچھی نیت بندے کو جنّت میں پہنچا دیتی ہے ، بیان سننے سے پہلے کچھ اچھی اچھی نیتیں کر لیجئے ! مثلاً نیت کیجئے : * رِضَائے اِلٰہی کے لئے بیان سُنوں گا * عِلْمِ دین سیکھوں گا * پُورا بیان سُنوں گا * ادب سے بیٹھوں گا * نصیحت حاصِل کروں گا * اَحْمَدِ مجتبیٰ ، مُحَمَّدِ مصطفےٰ صلی اللہ عَلَیْہِ وَ آلِہٖ  وَسَلَّم کا نامِ پاک سُن کر درودِ پاک پڑھوں گا۔

صَلُّوْا عَلَی الْحَبیب !                                                صَلَّی اللہ عَلٰی مُحَمَّد

مغفرت کا ایک سبب

ایک مرتبہ صحابئ رسول حضرت عبد اللہ بن عمر رَضِیَ اللہ عنہ ( روزے سے تھے ،  ) آپ نے زمین پر روٹی کا ٹکڑا پڑا دیکھا تو غُلام سے فرمایا : اِسے اٹھا ؤ اور صاف کر دو ! (  غُلام نے روٹی کا ٹکڑا اُٹھایا ، صاف کیا اور کھا لیا ) ۔ شام کو جب اِفطار کا وقت ہوا تو حضرت عبد اللہ بن عمر رَضِیَ اللہ عنہ نے غُلام سے فرمایا : لاؤ ! وہ روٹی کا ٹکڑا دے دو ! غُلام نے عرض کیا : عالی جاہ ! وہ تو میں نے کھا لیا۔ بس اتنا سننے کی دَیْر تھی کہ فرمایا : جا ! اب سے تُو آزاد ہے۔

 ( پھر آپ نے اس نوازش کا سبب بیان کرتے ہوئے فرمایا : ) میں نے تاجدارِ مدینہ ، راحتِ قلب و سینہ صَلَّی اللہ عَلَیْہِ وَ آلِہٖ وَ سَلَّم کو فرماتے سُنا کہ جو روٹی کا پڑا ہوا ٹکڑا اُٹھا کر کھا لیتا ہے وہ ٹکڑا اُس کے پَیٹ میں پہنچنے سے پہلے ہی اللہ پاک اُس کی مَغْفِرَت فرما دیتا ہے۔اب جو مَغْفِرَت کا حقدار ہو گیا میں اُس کو غُلام کس طرح بنائے رکھوں ؟ ^{( [1] )}

عفو  و رحمت کا بخشش کا سائِل                                                                     ہوں نہایت گنہگار و غافِل

میرا سب حال تجھ پر کھلا ہے                                                                        یاخُدا ! تجھ سے میری دُعا ہے