ہے عرض جمیلِ رضوی کا یہ خُلاصہ                                                   لاشہ     ہو      مرا      اور      بیابانِ     مدینہ^([1])

صَلُّوْا عَلَی الْحَبِیْب!                                               صَلَّی اللہُ عَلٰی مُحَمَّد

مدینہ محبوب شہر ہے

پیارے اسلامی بھائیو! الحمد للہ! مدینہ مُنَوَّرہ کے فضائل بےشُمار ہیں، انہی میں ایک فضیلت یہ بھی ہے کہ مدینہ مُنَوَّرہ شہرِ محبّت ہے۔ اس پاک شہر کے 100 سے زیادہ نام ہیں، ان میں سے 3نام یہ ہیں: (1):مَحْبُوبَہ (2):مُحَبَّہ(3):مُحَبَّبَہ۔ان تینوں نام کے معانی تقریباً ملتے جلتے ہیں۔ مطلب یہ ہے کہ مدینہ محبوب شہر ہے، پیارا شہر ہے، یہ عظیمُ الشان شہر شہرِ محبّت ہے۔

الحمد للہ! مدینہ پاک وہ مُقَدَّس شہر ہے، جس سے اللہ پاک بھی محبّت فرماتا ہے، اس کے رسول بھی محبّت فرماتے ہیں، بالخصوص آخری نبی، مُحَمَّد ِعربی صَلَّی اللہُ عَلَیْہِ وَ آلِہٖ وَ سَلَّم تو بہت ہی محبّت فرماتے ہیں، اللہ پاک کے فرشتے بھی مدینے سے محبّت فرماتے ہیں اور اللہ پاک کے فضل سے، اس کی عطا سے صحابۂ کرام رَضِیَ اللہُ عنہم سے لے کر آج تک عُشَّاقانِ رسول مدینے سے محبّت بھی کرتے ہیں، اِس کی یادوں میں تڑپتے بھی ہیں، مدینے کی حاضِری کیلئے ترستے بھی ہیں اور دَم دَم ذِکْرِ مدینہ کر کے رُوح کو سکون بھی دیتے ہیں۔

مدینہ، مدینہ، ہمارا مدینہ                                                                                                        ہمیں جان و دِل سے ہے پیارا مدینہ

سُہانا، سُہانا دِل آرا مدینہ                                                                                            دِوانوں کی آنکھوں کا تارا مدینہ

یہ ہر عاشِقِ مصطفےٰ کہہ رہا ہے                                                                        ہمیں تو ہے جنّت سے پیارا مدینہ

مدینے کے جلووں کے قربان جاؤں                                خُدا نے ہے کیسا سَنْوارا مدینہ

خُدا گر قیامت میں فرمائے مانگو...!!                                      پُکاریں گے دِیوانے پیارا مدینہ