اس وقت اِسْلام (جسمانی صُورت میں آئے گا اور) عرض کرے گا: يَا رَبِّ هٰذَا عُمَرُ اَعَزَّنِيْ فِيْ دَارِ الدُّنْيَا فَاَعِزْهُ فِيْ عَرَصَاتِ الْقِيَامَةِ یعنی اے رَبِّ رحمٰن و رحیم! یہ عمر ہیں، انہوں نے دُنیا میں میری عزّت بلند کی، آج میدانِ قیامت میں تُو انہیں عزّت عطا فرما۔

اس کے ساتھ ہی حضرت عمر فاروقِ اعظم رَضِیَ اللہُ عنہ کو  2 جُبّے پہنائے جائیں گے، ان جُبَّوں کی خوشبو ایسی ہو گی کہ ان میں سے ایک بھی دُنیا میں کھول دیا جائے تو ساری دُنیا اس کی مہک سے مُعَطَّر ہو جائے۔ حضرت عمر فاروقِ اعظم رَضِیَ اللہُ عنہ کو نُورانی اونٹنی پر بٹھایا جائے گا، آپ کے آگے 70 ہزار جھنڈے لہرا رہے ہوں گے، اس وقت میدانِ محشر میں ایک آواز گونجے گی: یٰاَهْلَ الْمَوْقَفِ هٰذَا عُمَرُ فَاعْرِفُوْهُ اے اَہْلِ محشر! یہ عمر ہیں، انہیں پہچان لو...!^([1])

سُبْحٰنَ اللہ! کیا شان ہے حضرت فارُوقِ اعظم رَضِیَ اللہُ عنہ...!!

لَوْ کَانَ بَعْدِیْ کہہ کے بڑھائی نبی نے شان                          اِنسانیت کے ایک چمکتے گُہر عمر

بولے انہیں ”مُحَدَّث خَیُرُ الْاُمَم“ حضور                                      اسرارِ حق سے ایسے ہوئے باخبر عمر

آیات کا نُزول ہوا ان کی رائے سے                                                   ہیں جلوۂ مَعَارِفِ حق، سَر بَسَر عمر

پہلوئے مصطفےٰ میں بنی تیری قبر پاک                                             ہے عرش سے عظیم ترا مُسْتَقَرْ عمر

یومِ فارُوق منائیے!

پیارے اسلامی بھائیو! یکم مُحَرَّمُ الحرام کو یومِ فارُوقِ اعظم ہے، اس دِن آپ شہید ہوئے تھے، لہٰذا *نیک مؤمن، نہایت پختہ دِین والے، عظیم الشان صحابئ رسول، مسلمانوں کے دوسرے خلیفہ، وزیرِ مصطفےٰ حضرت فارُوقِ اعظم رَضِیَ اللہُ عنہ کی یاد منائیے!