فرق طالِب و مطلوب دیکھے کوئی                                              قصۂ طُور و مِعْراج سمجھے کوئی

کوئی بیہوش، جلووں میں گم ہے کوئی                             کس کو دیکھا یہ موسیٰ سے پوچھے کوئی

آنکھ والوں کی ہمّت پہ لاکھوں سلام

پیارے محبوب صَلَّی اللہُ عَلَیْہِ وَ آلِہٖ وَسَلَّم کو باربار جلوۂ نُورِ اِلٰہی دیکھنے کی سَعَادَت کہاں ملی؟ اللہ پاک فرماتا ہے:

عِنْدَ سِدْرَةِ الْمُنْتَهٰى(۱۴) (پارہ:27، النجم:14)

تَرْجَمَۂ کَنْزُالْعِرْفَان: سِدْرۃُ المنتہیٰ کے پاس۔

یعنی اس وقت رسولِ اکرم، نورِ مُجَسَّم صَلَّی اللہُ عَلَیْہِ وَ آلِہٖ وَسَلَّم سِدْرۃُ المنتہیٰ سے بہت آگے تشریف رکھتے تھے۔^([1]) یہ سِدْرۃُ المنتہیٰ کہاں ہے؟ فرمایا:

عِنْدَهَا جَنَّةُ الْمَاْوٰىؕ(۱۵) (پارہ:27، النجم:15)

تَرْجَمَۂ کَنْزُالْعِرْفَان: اس کے پاس جنت الماویٰ ہے۔

جنّت کے مختلف درجات ہیں، ان میں سے ایک درجہ جنّت الماویٰ ہے، یہ وہ جنّت ہے جہاں حضرت آدم عَلَیْہِ السَّلَام تشریف فرما رہے ہیں،^([2]) یعنی سِدْرۃُ المنتہیٰ وہاں ہے، جہاں جنّتُ الْمَاویٰ ہے۔

جب پیارے آقا، مکی مَدَنی مصطفےٰ صَلَّی اللہُ عَلَیْہِ وَ آلِہٖ وَسَلَّم یہاں سِدْرۃُ المنتہیٰ کے پاس تھے، اس وقت کیا ہوا؟ فرمایا:

اِذْ یَغْشَى السِّدْرَةَ مَا یَغْشٰىۙ(۱۶) (پارہ:27، النجم:16)

تَرْجَمَۂ کَنْزُالْعِرْفَان: جب سِدرہ پر چھا رہا تھا جو چھا رہا تھا۔