کلمہ  طیبہ کے مختلف نام

پیارے اسلامی بھائیو ! کلمۂ طیبہ لَا اِلٰہَ اِلَّا اللہ مُحَمَّدٌ رَّسُولُ اللہ کے بہت سارے مبارک نام ہیں؛ * اس کا ایک نام : کلمۂ توحید بھی ہے * کلمۂ اِخْلاص بھی ہے * اسے کلمۂ اِحْسَان بھی کہتے ہیں * اسے کَلْمِةُ  التَّقْویٰ بھی کہتےہیں * اس مبارک کلمے کا ایک نام : کلمۂ ثابِتہ  ( یعنی ثابت شُدہ کلمہ ، پکّا کلمہ ، نہ مٹنے والاکلمہ ، ہمیشہ رہنے والا کلمہ )  بھی  ہے۔

کلمہ طیبہ شجرہ  طیبہ ہے

اللہ پاک قرآنِ کریم میں فرماتا ہے :

ضَرَبَ اللّٰهُ مَثَلًا كَلِمَةً طَیِّبَةً كَشَجَرَةٍ طَیِّبَةٍ اَصْلُهَا ثَابِتٌ وَّ فَرْعُهَا فِی السَّمَآءِۙ(۲۴) تُؤْتِیْۤ اُكُلَهَا كُلَّ حِیْنٍۭ بِاِذْنِ رَبِّهَاؕ     ( پارہ : 13 ، سورۂ ابراہیم : 24 -25 )

ترجمہ کَنْزُ الایمان : اللہ نے کیسی مثال بیان فرمائی پاکیزہ بات کی جیسے پاکیزہ درخت جس کی جڑ قائم اور شاخیں  آسمان میں ۔ ہر وقت اپنا پھل دیتا ہے اپنے رب کے حکم سے۔

حضرت ابنِ عباس رَضِیَ اللہ عنہ فرماتے ہیں : اس آیتِ مبارکہ میں پاکیزہ بات سے مراد لَا اِلٰہَ اِلَّا اللہ ہے۔ ^{( [1] )}   یعنی  * کلمۂ طیبہ وہ پاکیزہ درخت ہے جس کی جڑیں مسلمان کے دِل میں ہیں * اس کی شاخیں ( یعنی مسلمان کی نیکیاں )  آسمان تک پہنچتی ہیں * دوسرے درخت تو ایسے ہیں جو سال میں ایک مرتبہ یا دو مرتبہ پھل دیتے ہیں مگر کلمۂ طیبہ وہ پاکیزہ کلمہ ہےجو اپنے پڑھنے والے کو ہر لمحے تازہ پھل دیتا ہے * کلمۂ طیبہ کی برکت سے ہر لمحے مسلمان کوتازگی ملتی ہے * ہر لمحے اس کا ایمان برقرار رہتا ہے * اس کی برکت سے ہر لمحے آدمی اللہ پاک کی رحمتوں کا مستحق بنتا رہتا ہے۔