حضرت شیخ عبد الحق محدثِ دِہلوی رحمۃُ اللہ علیہ  لکھتے ہیں : یہ کُنواں ایک غیر مسلم  ( Non-Muslim ) کاتھا ،  حضرت عثمانِ غنی رضی اللہ عنہ نے اس سے 12 ہزار دِرْہم  ( یعنی چاندی کے سِکّوں )  کے بدلے آدھا کُنْواں خریدا ، اب چونکہ کنویں کا آدھا حِصَّہ وقف ہو چکا تھا ، لہٰذا کسی کو بھی پانی خریدنے کی ضرورت نہیں پڑتی تھی ، یُوں اس غیر مسلم کو اس سے نفع ( Profit )  کمانا مشکل ہو گیا ، چنانچہ اس نے کُنْویں کا باقی آدھا حِصّہ بھی آپ ہی کے ہاتھ 8 ہزار دِرْہم کے بدلے بیچ دیا۔ ^{( [1] )}  یعنی حضرت عثمان غنی رضی اللہ عنہ نے کل 20 ہزار درہم کے بدلے یہ کنواں خرید کر وقف کیا اور جنّت  کے حقدار قرار پائے۔

اے اللہ ! عثمان کے لئے جنّت لازم کر دے

پیارے اسلامی بھائیو !  اِس مُبارک کُنوئیں کی شان و عظمت پہ لاکھوں سلام کہ اِس مبارک کُنوئیں سے اللہ پاک کے پیارے حبیب  صَلَّی اللہ عَلَیْہِ وَ آلِہٖ وَسَلَّم  کا پانی پینا بھی ثابت ہے۔   روایات میں ہے : ایک مرتبہ حضورِ اکرم ، نُورِ مُجَسَّم  صَلَّی اللہ عَلَیْہِ وَ آلِہٖ وَسَلَّم یہاں سے گزرے ،  عرض کیا گیا : یارسولَ اللہ صَلَّی اللہ عَلَیْہِ وَ آلِہٖ وَ سَلَّم ! یہ کُنْواں ہے جو حضرت عثمان ِ غنی رضی اللہ عنہ  نے خرید کر صدقہ کیا تھا۔ یہ سُن کر آپ صَلَّی اللہ عَلَیْہِ وَ آلِہٖ وَ سَلَّم نے دُعا مانگی : اے اللہ پاک ! عثمان کے لئے جنّت لازِم کر دے۔  پِھر آپ صَلَّی اللہ عَلَیْہِ وَ آلِہٖ وَ سَلَّم نے اس کنویں سے پانی پیا اور فرمایا : اِس وادی میں عنقریب بہت چشمے ہوں گے جو بہت میٹھے ہوں گے لیکن بئرِ مُزنی  ( یعنی بئرِ رُومہ ) اُن سب سے میٹھا ہوگا۔ ^{( [2] )}