اُولٰٓىٕكَ الَّذِیْنَ هَدَى اللّٰهُ فَبِهُدٰىهُمُ اقْتَدِهْؕ-

 ( پارہ : 7 ، الانعام : 90 )

تَرجَمہ کَنْزُ الْعِرْفان :  یہی وہ  ( مقدس )  ہستیاں ہیں جنہیں اللہ نے ہدایت کی تو تم ان کی ہدایت کی پیروی کرو۔

مشہور مفسرِ قرآن ، حکیم الاُمَّت مفتی احمد یار خان نعیمی    رحمۃُ اللہ عَلَیْہ   اس آیت کی تفسیر میں لکھتے ہیں :  یعنی اے محبوب  صَلَّی اللہ عَلَیْہِ وَ آلِہٖ وَ سَلَّم ! ہم نے پہلے انبیائے کرام علیہم السَّلام کو بہت سارے اَوْصاف و کمالات عطا فرمائے تھے ، آپ ان تمام اَوْصاف و کمالات کے جامِع بن جائیے کہ جو کمالات ان میں ایک ایک ، دو دو تھے ، وہ سب کے سب آپ میں جمع ہوں ، حضُور صَلَّی اللہ عَلَیْہِ وَ آلِہٖ وَ سَلَّم کی پاکیزہ زِندگی اس آیت کی جیتی جاگتی تفسیر ہے۔ اس سے معلوم ہوا؛ اللہ پاک نے اپنے محبوب صَلَّی اللہ عَلَیْہِ وَ آلِہٖ وَ سَلَّم کو جامعِ صفَات بنایا ہے یعنی تمام نبیوں کے اَوْصاف و کمالات آپ میں جمع فرما دئیے۔  ^{( [1] )}  

نوح و خلیل و موسیٰ و عیسیٰ                        سب کا ہے آقا نامِ مُحَمَّد

سارے چمن میں لاکھوں گلوں میں               گل ہے ہزارا نامِ مُحَمَّد

پائیں مرادیں دونوں جہاں میں                  جس نے پُکارا نامِ مُحَمَّد ^{( [2] )}

نامِ مُحَمَّد اور عقیدۂ ختمِ نبوت

پیارے اسلامی بھائیو !  ہمارے پیارے آقا ، مکی مدنی مصطفےٰ صَلَّی اللہ عَلَیْہِ وَ آلِہٖ وَ سَلَّم کے پیارے پیارے نام مُحَمَّد سے متعلق عُلَمائے کرام نے ایک بڑا خوبصُورت نکتہ بیان کیا ہے ، فرماتے ہیں :  لفظِ مُحَمَّد حَمْد سے بنا ہے اور حَمْد ہمیشہ آخر میں کی جاتی ہے ، جیسے  * ہم کھانا کھائیں تو آخر میں کہتے ہیں :  الحمد للہ !  * جب پانی پئیں تو آخر میں کہتے ہیں :  الحمد للہ !