اَلْحَمْدُ لِلہِ رَبِّ الْعٰلَمِیْنَ وَالصَّلٰوۃُ وَالسَّلَامُ عَلٰی خَاتَمِ النَّبِیّٖن

اَمَّا بَعْدُ! فَاَعُوْذُ بِاللہِ مِنَ الشَّیْطٰنِ الرَّجِیْمِ بِسْمِ اللہِ الرَّحْمٰنِ الرَّحِیْمِ

اَلصَّلٰوۃُ وَالسَّلَامُ عَلَیْکَ یَارَسُوْلَ اللہ                                        وَعَلٰی آلِکَ وَاَصْحٰبِکَ یَاحَبِیْبَ اللہ

اَلصَّلٰوۃُ وَالسَّلَامُ عَلَیْکَ یَانَبِیَّ اللہ                                                       وَعَلٰی آلِکَ وَاَصْحٰبِکَ یَانُوْرَ اللہ

نَوَیْتُ سُنَّتَ الْاِعْتِکَاف                                                                                                         (ترجمہ: میں نے سُنَّت اعتکاف کی نِیَّت کی)

درودِ پاک کی فضیلت

حضرت سُفیان ثَوری  رحمۃُ اللہِ علیہ  جو بہت بڑے عالِم، فاضِل،مُحدِّث اور بڑے وَلِیُّ اللہ ہوئے ہیں۔ آپ فرماتے ہیں: ایک مرتبہ مجھے حجّ  کی سعادت ملی، میں نے دورانِ طواف ایک نوجوان کودیکھا، وہ طواف کی دوسری دُعائیں پڑھنے کی بجائے صِرْف درودِ پاک ہی پڑھتا جا رہا تھا، میں نے حیرانی سے پوچھا: تم صِرْف درودِ پاک ہی کیوں پڑھ رہے ہو، باقی دُعائیں بھی تو ہیں، وہ کیوں نہیں پڑھتے...؟ اُس نوجوان نے پہلے تو میرا نام پوچھا، پِھر اپنا واقعہ سُناتے ہوئے بولا: میں اور میرے والِد صاحِب حجّ  کے لیے  روانہ ہوئے تھے، دورانِ سَفَر ایک جگہ والِد صاحِب شدید بیمار ہو گئے، چنانچہ ہم رُک گئے، عِلاج وغیرہ شروع ہوا مگر

مرض بڑھتا گیا جُوں جُوں دوا کی

والِد صاحِب کا وقتِ آخر آ چکا تھا، اِس لیے  کسی دوا نے اَثَر نہ کیا، آخِر والِدِ محترم وفات پا گئے۔ اَوَّل تو سَفَر کی مشکلات، پِھر والِد صاحِب کا صدمہ...!! اِس کے ساتھ ساتھ ایک اَور مشکل یہ ہو گئی کہ جُونہی والد صاحِب کا اِنتقال ہوا، ساتھ ہی اُن کا چہرہ کالا سیاہ ہو گیا۔ میں بہت پریشان تھا، دِل صدمے سے چُور چُور تھا، اِسی پریشانی کے عالَم میں اچانک میری آنکھ لگ گئی، کیا دیکھتا ہوں؛ ایک نہایت حسین و جمیل ہستی، نُور بھرا چہرہ چمکاتے، خوشبوئیں