Book Name:Duniya Akhirat Ki Kheti Hai
تِرا نازُک بدن بھائی جو لیٹے سَیج پھولوں پر یہ ہوگا ایک دن بے جاں اِسے کیڑوں نے کھانا ہے
تُو اپنی موت کو مت بھول کر سامان چلنے کا زمیں کی خاک پر سونا ہے اِینٹوں کا سِرہانا ہے
نہ بَیلی ہو سکے بھائی نہ بیٹا باپ تے مائی تُو کیوں پھرتا ہے سَودائی عمل نے کام آنا ہے
عزیزا یاد کر جس دن کہ عِزرائیل آئیں گے نہ جاوے کوئی تیرے سَنگ اکیلا تُو نے جانا ہے
جہاں کے شَغل میں شاغِل خدا کے ذِکر سے غافِل کرے دعوٰی کہ یہ دنیا مِرا دائم ٹِھکانہ ہے
غُلام اِک دَم نہ کر غفلت حیاتی پر نہ ہو غُرَّہ خدا کی یاد کر ہر دم کہ جس نے کام آنا ہے
صَلُّوْا عَلَی الْحَبِیْب! صَلَّی اللہُ عَلٰی مُحَمَّد
ایک مرتبہ کسی عقلمند شخص نے اپنے ایک دوست کو خط لکھا اور بڑی سبق آموز نصیحت کی، اُنہوں نے لکھا:یہ دُنیا ایک نیند ہے اور آخرت بیداری ہے ان دونوں کے درمیان (یعنی نیند سے جگانے والی چیز) موت ہے اور ہم نیند کی حالت میں پریشان،اُلجھے ہوئے خواب دیکھ رہے ہیں۔([1])
اے عاشقانِ رسول! یہ حقیقت ہے...!!ہم خواب دیکھ رہے ہیں، اُلجھے ہوئے پریشان خواب اور اُن خوابوں کو سچّا کرنے کی خاطِر بَس اندھا دُھند دوڑتے چلے جا رہے ہیں، دوڑتے چلے جا رہے ہیں، ہماری مَنْزِل کہاں ہے؟ کچھ خبر نہیں؟ رُکنا کہاں ہے؟ کچھ خبر نہیں؟ موت سامنے کھڑی ہے، قَبْر کا گڑھا آنکھوں کے سامنے ہے اور ہم بالکل فِکْر نہیں کرتے، ابھی ہوش میں آنے کا وقت ہے وگرنہ سوائے افسوس کے کچھ ہاتھ نہ آئے گا۔