مصیبت آتی ہے تو کہتے ہیں : ہم اللہ ہی کے ہیں اور ہم اسی کی طرف لوٹنے والے ہیں  یہ وہ لوگ ہیں جن پر ان کے ربّ کی طرف سے درود ہیں اور رحمت اور یہی لوگ ہدایت یافتہ ہیں۔

آنکھیں رو رو کے سُجانے والے                                                             جانے والے نہیں آنے والے ^{( [1] )}

وضاحت : اے کسی بچھڑنے والے کے غم میں رو رو کر اپنی آنکھیں خراب کر لینے والے ! جو چلا گیا وہ تو واپس نہ آئے گا بلکہ ہم ہی اس کے پیچھے جائیں گے۔

سُبْحٰنَ اللہ ! پیارے اسلامی بھائیو ! اللہ والوں کے انداز نِرالے ہی ہوتے ہیں ، خیر ! یہ تو مشکل بات ہے کہ ہم مصیبت آنے پر بھی خُوش ہی رہیں ، نہ چاہتے ہوئے بھی بعض دفعہ دِل پر غم چھا جاتا ہے ، آنکھوں میں آنسو آجاتے ہیں۔ اس کی خیر ہے ، البتہ ہمیں صبر ضرور کرنا چاہئے ، لہٰذا جب بھی کوئی مشکل ، پریشانی یا مصیبت آئے تو شور مچانے ، اپنے کپڑے پھاڑنے ، بال نوچنے ، واوَیلا کرنے کی بجائے صبر کا گھونٹ پِی کر اِنَّا لِلّٰہ وَاِنَّا اِلَیْہِ رَاجِعُوْن پڑھ لیجئے ! اِنْ شَآءَ اللہ الْکَرِیْم ! بہت سارا ثواب ہاتھ آئے گا۔

اللہ پاک کی رحمت دِلانے والا عمل

اللہ پاک کے آخری نبی ، رسولِ ہاشمی صلّی اللہ ُ عَلَیْہِ وَ آلِہٖ وَسَلَّم نے فرمایا : مصیبت کے وقت اِنَّا لِلّٰہ وَاِنَّا اِلَیْہِ رَاجِعُوْن پڑھنا اللہ پاک کی رحمت ملنے کا ذریعہ ہے۔ ^{( [2] )}