ڈھیروں ثواب ملے گا اور اللہ پاک نے چاہا تو جنّت کے حق دار بن جائیں گے۔

اِنَّا لِلّٰہ کی برکت سے بہترین بدل ملتا ہے

پیارے اسلامی بھائیو ! مصیبت پر اِنَّا لِلّٰہ پڑھنے کی ایک بڑی برکت یہ بھی ہے کہ اس سے مصیبت دُور ہوتی ہے اور اللہ پاک دُنیا ہی میں اچھا بدل عطا فرمادیتا ہے۔ حدیثِ پاک میں ہے ، نبیوں کے نبی ، رسولِ ہاشمی صلّی اللہ ُ عَلَیْہِ وَ آلِہٖ وَسَلَّم نے فرمایا : جو مصیبت کے وقت اِنَّا لِلّٰہ وَ اِنَّااِلَیْہِ رَاجِعُوْن کہتا ہے اللہ پاک اس کی پریشانی دُور فرما دیتا ہے ، اس کا انجام اچھا کرتا ہے اور اسے ایسا بدل عطا فرماتا ہے جس پر وہ راضی ہو جاتا ہے۔ ^{( [1] )}   

ایک حدیث شریف میں ہے : جس مسلمان پر کوئی مصیبت آئے اور وہ اللہ پاک کے حکم کے مطابق اِنَّا لِلّٰهِ وَ اِنَّاۤ اِلَیْهِ رٰجِعُوْنَ  ( پڑھے اور یہ دعا کرے )  اَللّٰہُمَّ أَجُرْنِیْ فِیْ مُصِیْبَتِیْ وَاَخْلِفْ لِیْ خَیْرًا مِّنْہَا یعنی اے اللہ ! میری اس مصیبت پر مجھے اجر عطا فرما اور مجھے اس کا بہتر بدل عطا فرما ! تو اللہ پاک اس کو اس سے بہتر بدل عطا فرمائے گا۔ ^{( [2] )}

حکیمُ الْاُمَّت مفتی احمد یار خان نعیمی  رحمۃ اللہ علیہ اس حدیثِ پاک کی شرح میں فرماتے ہیں : یہ عمل بڑا مُجَرَّب   ( تجربہ شدہ )   ہے۔ فوت شدہ میت اور گم شدہ چیز سب پر پڑھا جائے لیکن جس گمی چیز کے ملنے کی امید ہو اس پر رَاجِعُوْنَ تک پڑھے اور جس سے مایوسی ہو چکی ہو اس پر پورا پڑھے ،  مگر ضروری یہ ہے کہ زبان پر یہ الفاظ ہوں اور دل میں صبرہو۔ ^{( [3] )}

صَلُّوْا عَلَی الْحَبیب !                                                صَلَّی اللّٰہُ عَلٰی مُحَمَّد