ایک افطار غریبوں کے ساتھ

صحابی اِبْنِ صحابی حضرت عبد اللہ بن عمر   رَضِیَ اللہُ عنہما  کی عادَت مُبارَک تھی کہ آپ افطاری مسکینوں کے ساتھ کیا کرتے تھے۔^([1])

سُبْحٰنَ اللہ!ہم بھی نِیّت کر لیں زیادہ نہیں تو کم از کم ایک اِفطار تو کسی غریب کے ساتھ کریں،اِنْ شَآءَ اللہُ الْکَرِیْم!اُس کی دِل جُوئی ہو گی، اُس کے دِل سے دُعائیں نکلیں گی تو اِنْ شَآءَ اللہُ الْکَرِیْم!ہمارا بیڑا پار ہو جائے گا۔

ہو مرا کام غریبوں کی حمایت کرنا                                                  دردمندوں سے، ضعیفوں سے محبّت کرنا

اِعْتکاف کے فضائل

پیارے اسلامی بھائیو! کامیابی پانے کے یہ 3نسخےہیں: (1):نمازیں پڑھیں (2): خُوب عِبَادت کریں، گُنَاہوں سے بچیں (3):خوب بھلائیاں کریں۔

کامیابی کے اِن تینوں نسخوں پر عَمَل کرتے ہوئے رمضان شریف کامیابی کے ساتھ گزارنا چاہتے ہیں تو اِس کا بہت آسان ذریعہ ہے کہ ہم اِعْتکاف کر لیں، ویسے تو عموماً آخری عشرے کا اعتکاف کیا جاتا ہے اور یہ سُنّتِ مؤکدہ عَلَی الْکِفَایَہ بھی ہے (یعنی ایک نے کر لیا تو سب بَرِیُّ الذِّمَّہ ہو گئے)،^([2]) البتہ! پُورے ماہ کا اعتکاف کرنا بھی محبوبِ ذیشان، مکی مَدَنی سُلطان  صلّی اللہ عَلَیْہِ وَ آلِہٖ وَسَلَّم  سے ثابِت ہے،^([3]) لہٰذا پُورا مہینا ہی اِعْتکاف کر لیں۔