اَلْحَمْدُ لِلّٰہِ رَبِّ الْعٰلَمِیْنَ وَ الصَّلٰوۃُ وَالسَّلَامُ عَلٰی سَیِّدِ الْمُرْسَلِیْنَ ^ط

اَمَّا بَعْدُ فَاَعُوْذُ بِاللّٰہِ مِنَ الشَّیْطٰنِ الرَّجِیْمِ ^ط  بِسْمِ اللہ الرَّحْمٰنِ الرَّ حِیْم ^ط

اَلصَّلٰوۃُ وَ السَّلَامُ عَلَیْكَ یَا رَسُولَ اللہ                                                       وَعَلٰی اٰلِكَ وَ اَصْحٰبِكَ یَا حَبِیْبَ اللہ

اَلصَّلٰوۃُ وَ السَّلَامُ عَلَیْكَ یَا نَبِیَّ اللہ                                                                        وَعَلٰی اٰلِكَ وَ اَصْحٰبِكَ یَا نُوْرَ اللہ

نَوَیْتُ سُنَّتَ الْاِعْتِکَاف                                    ( ترجمہ : میں نے سُنَّت اعتکاف کی نِیَّت کی )

درودِ پاک کی فضیلت

حضرتِ ابو حفص کاغذی رَحمۃُ اللہ عَلَیْہ بہت بڑے سردار تھے ، آپ کے انتقال کے بعد کسی نے آپ کو خواب میں دیکھ کر پوچھا : اللہ پاک نے آپ کے ساتھ کیا معاملہ فرمایا؟ جواب دیا : اللہ پاک نے رحم فرمایا ، مجھے بخش دیا اور جنّت عطا فرما دی۔ خواب دیکھنے والے نے پوچھا : کس سَبب سے؟ فرمایا : بارگاہِ اِلٰہی میں میری حاضِری ہوئی ، میرا حساب لیا گیا ، فرشتوں کو حکم ہوا : اس کے گُنَاہ شُمار کرو! فرشتوں نے گُنَاہوں کی گنتی کی۔ پھر حکم ہوا : اس نے دُنیا میں ہمارے محبوب صلی اللہ عَلَیْہِ وَ آلِہٖ وَسَلَّم پر جو درود شریف پڑھے ہیں ، ان کی گنتی کرو! فرشتوں نے میرے پڑھے ہوئے درود شریف شُمار کئے۔ پَس میرے پڑھے ہوئے درود شریف میرے گُنَاہوں سے زیادہ نکلے۔ چنانچہ اللہ پاک نے فرمایا :  بَس! اے فرشتو کافی ہے۔ اس کا مزید حساب نہ کرو! اسے ہماری جنّت میں لے جاؤ...! ^{( [1] )}

قربِ خُدا ہو حاصِل جنت میں ہو وہ داخل     جس نے لکھا پڑھا ہے صَلِّ عَلٰی مُحَمَّد

جانے بھی دے اِرم کو رِضوان نہ روک ہم کو       سینے پہ لکھ لیا ہے صَلِّ عَلٰی مُحَمَّد