Hajio aao shahenshah ka roza dekho

شَرَف دے حج کا مجھے میرے کبریا  یارب

شَرَف دے حج کا مجھے میرے کبریا  یارب

روانہ سُوئے مدینہ ہو قافِلہ یارب

دکھادے ایک جھلک سبز سبز گنبد کی

بس اُن کے جلووں  میں آجائے پھر قضا یارب

بَوقتِ نَزع سلامت رہے مِرا ایماں

مجھے نصیب ہو توبہ ہے التجا یارب

تِری مَحَبَّت اُتر جائے  میری نَس نَس میں

پئے رضا ہو عطا عشقِ مصطفیٰ یارب

جواب قبر میں مُنکَر نکیر کو دوں گا

ترے کرم سے اگر حوصَلہ ملا یارب

بروزِ حشر چھلکتا سا جام کوثر کا

بدستِ ساقیِ کوثر ہمیں پِلا یارب

بقیعِ پاک میں عطّاؔر دَفْن ہو جائے

برائے غوث و رضا از پئے ضِیا یارب

(وسائلِ بخشش(مُرَمَّم)،ص87)

از شیخِ طریقت امیرِ اہلِ سنّت  دَامَتْ بَرَکاتُہُمُ الْعَالِیَہ

حاجیو !آؤ شہنشاہ کا روضہ دیکھو

حاجیو! آؤ شہنشاہ کا رَوضہ دیکھو

کعبہ تو دیکھ چکے کعبہ کا کعبہ دیکھو

آبِ زَمزم تو پِیا خُوب بجھائیں پیاسیں

آؤ جُودِ شہِ کوثَر کا بھی دریا دیکھو

خُوب آنکھوں سے لگایا ہے غِلافِ کعبہ

قَصْرِ محبوب کے پَردے کا بھی جَلوہ دیکھو

مہرِ مادَر کا مزہ دیتی ہے آغوشِ حطیم

جن پہ ماں باپ فدا یاں کَرَم اُن کا دیکھو

دھو چُکا ظُلمتِ دل بَوسۂ سنگِ اَسْوَد

خاک بوسیِ مدینہ کا بھی رُتبہ دیکھو

جمعۂ مکّہ تھا عید اہلِ عبادت کے لئے

مجرمو! آؤ یہاں عیدِ دَوشَنْبہ دیکھو

غور سے سُن تو رضؔا کعبہ سے آتی ہے صَدا

میری آنکھوں سے مِرے پیارے کا روضہ دیکھو

(حدائقِ بخشش،ص127)

از امامِ اہلِ سنّت امام احمد رضا خان  علیہ رحمۃ  الرَّحمٰن

ملی تقدیر سے مجھ کو صحابہ کی ثنا خوانی

ملی تقدیر سے مجھ کو صحابہ کی ثنا خوانی

ملا ہے فیضِ عثمانی ملا ہے فیضِ عثمانی

رکھا مَحصور ان کو بند ان پر کر دیا پانی

شہادت حضرتِ عثمان کی بے شک ہے لاثانی

نبی کے نور دو^۲ لیکر وہ ذُوالنُّورَین کہلائے

انہیں حاصل ہوئی یوں قُربتِ محبوبِ رحمانی

ہم ان کی یاد کی دھومیں مچائیں گے قیامت تک

پڑے ہوجائیں جل کر خاک سب اعدائے عثمانی

مجھے اپنی سَخاوت کے سَمُندر سے کوئی قَطرہ

عطا کر دو نہیں درکار مجھ کو تاجِ سلطانی

عُلوِّ شان کا کیوں کر بَیاں ہو آپ کی پیارے

حیا کرتی ہے مولیٰ آپ سے مخلوقِ نورانی

سُخن آکر یہاں عطّاؔر کا اِتمام کو پہنچا

تِری عظمت پہ ناطِق اب بھی ہیں آیاتِ قرآنی

(وسائلِ بخشش(مُرَمَّم)،ص584)

از شیخِ طریقت امیرِ اہلِ سنّت  دَامَتْ بَرَکاتُہُمُ الْعَالِیَہ