اَلْحَمْدُ لِلّٰہِ رَبِّ الْعٰلَمِیْنَ وَ الصَّلٰوۃُ وَالسَّلَامُ عَلٰی سَیِّدِ الْمُرْسَلِیْنَ ^ط

اَمَّا بَعْدُ فَاَعُوْذُ بِاللّٰہِ مِنَ الشَّیْطٰنِ الرَّجِیْمِ ^ط  بِسْمِ اللہ الرَّحْمٰنِ الرَّ حِیْم ^ط

اَلصَّلٰوۃُ وَ السَّلَامُ عَلَیْكَ یَا رَسُولَ اللہ                                                       وَعَلٰی اٰلِكَ وَ اَصْحٰبِكَ یَا حَبِیْبَ اللہ

اَلصَّلٰوۃُ وَ السَّلَامُ عَلَیْكَ یَا نَبِیَّ اللہ                                                                        وَعَلٰی اٰلِكَ وَ اَصْحٰبِكَ یَا نُوْرَ اللہ

نَوَیْتُ سُنَّتَ الْاِعْتِکَاف                                    ( ترجمہ : میں نے سُنَّت اعتکاف کی نِیَّت کی )

درودِ پاک کی فضیلت

پیارے آقا ، مکی مدنی مصطفےٰ صَلَّی اللہ عَلَیْہِ وَ آلِہٖ وَ سَلَّم نے فرمایا : جب تم مؤذِّن کو اذان کہتے سُنو تو  ( اذان کا جواب دیتے ہوئے )  ایسے ہی کہو ، جیسے مؤذِّن کہتا ہے ، پھر مجھ پر درودپڑھو ! کیونکہ جو مجھ پر ایک بار درودِ پاک پڑھتا ہے ، اللہ پاک اس پر 10 رحمتیں نازِل فرماتا ہے۔ ^{( [1] )}

مایوس کیوں ہو عاصِیو ! تم حوصَلہ رکھو                                      رَب کی عطا سے انکا کرم ہے سبھی کے ساتھ

خطبہ ، اذاں ، نماز ، عبادت کوئی سی ہو                         ذکر نبی ضرور ہے  ہر بندگی کے ساتھ ^{( [2] )}

صَلُّوا عَلَی الْحَبیب !                                                صَلَّی اللہ عَلٰی مُحَمَّد

سَفَرِ ہجرت ، سَفَرِ تعمیرِ مساجِد

ہمارے آقا و مولیٰ ، مکی مدنی مصطفےٰ  صلّی اللہ ُ عَلَیْہِ وَ آلِہٖ وَسَلَّم  نے تقریباً 40 سال کی عمر مبارک  ( Age )  میں اِعْلانِ نبوت فرمایا ، اس کے بعد سے 13سال تک آپ مکہ مکرمہ میں تشریف فرما رہے اور نیکی کی دعوت دیتے رہے۔ کم و بیش 53 سال کی عمر مبارک میں آپ نے اللہ پاک کے حکم سے مکہ مکرمہ کو چھوڑا اور مدینۂ مُنَوَّرہ کی طرف ہجرت ( Migration )  فرمائی۔