یہ اللہ پاک کی رسّی کیا ہے، اس بارے میں ایک قول یہ ہے کہ اس سے ہمارے پیارے آقا، مکی مدنی مصطفےٰ صَلَّی اللہُ عَلَیْہِ وَ آلِہٖ وَ سَلَّم مراد ہیں۔ یعنی آپ صَلَّی اللہُ عَلَیْہِ وَ آلِہٖ وَ سَلَّم وہ مضبوط رسّی ہیں، جسے پکڑ کر ایک ہو جانے کا حُکم دیا گیاہے۔ اِمام شرفُ الدِّین بوصِیْری رَحمۃُ اللہِ عَلَیْہ آقائے نعمت، مُصطفےٰ جانِ رحمت صَلَّی اللہ عَلَیْہِ وَ آلِہٖ وَسَلَّم کی شان بیان کرتے ہوئے فرماتے ہیں:

دَعَا اِلَی اللہِ فَالْمُسْتَمْسِکُوْنَ بِہٖ                                                                           مُسْتَمْسِکُوْنَ بِحَبْلٍ غَیْرِ مُنْفَصِمِ^([1])

ترجمہ : حضورِ اکرم، نورِ مُجَسَّم  صَلَّی اللہ عَلَیْہِ وَ آلِہٖ وَسَلَّم نے لوگوں کو اللہ کی طرف بلایاتو جن لوگوں نے حضور صَلَّی اللہ عَلَیْہِ وَ آلِہٖ وَسَلَّم کے دامنِ رحمت کوتھام لیا اُنہوں نے ایسی مضبوط رسّی کو تھام لیا جو کبھی نہیں ٹوٹے گی ۔

سیدی اعلیٰ حضرت رَحمۃُ اللہِ عَلَیْہ بارگاہِ رسالت میں عَرْض کرتے ہیں:

نَرَفْتَم رَاہِ بِیْنَایَاں فُتَادَمْ دَرْ چَہِ عِصْیَاں

بِیَا اِے  حَبْلِ  رَحْمَانَمْ  اَغِثْنِیْ  یَا  رَسُوْلَ  اللّٰہ^([2])

ترجمہ: یارسولَ اللہ صَلَّی اللہُ عَلَیْہِ وَ آلِہٖ وَ سَلَّم! میں عقل مندوں کی راہ نہ چلا، گُنَاہوں کے گڑھے میں جا گِرا، اے رحمٰن کی مضبوط رَسّی...!! اے میرے پیارے کریم آقا صَلَّی اللہُ عَلَیْہِ وَ آلِہٖ وَ سَلَّم! میری مدد فرمائیے!

اب اس لحاظ سے آیتِ کریمہ کا مطلب یہ بنے گا کہ اے اِیْمان والو...!! مَحْبُوبِ ذیشان صَلَّی اللہُ عَلَیْہِ وَ آلِہٖ وَ سَلَّم کے دامنِ کرم کو مضبوط تھام لو! آپس کے لڑائی جھگڑے سب چھوڑو! عشقِ مصطفےٰ سینوں میں سجا کر سب آپس میں ایک ہو جاؤ!