اِلَّا تَنْصُرُوْهُ فَقَدْ نَصَرَهُ اللّٰهُ اِذْ اَخْرَجَهُ الَّذِیْنَ كَفَرُوْا ثَانِیَ اثْنَیْنِ اِذْ هُمَا فِی الْغَارِ (پارہ:10، سورۂ توبہ:40)

تَرْجمۂ کَنْزُالعِرْفان:اگر تم اس (نبی) کی مدد نہیں کرو گے تو اللہ ان کی مدد فرماچکا ہے جب کافروں نے انہیں (ان کے وطن سے) نکال دیا تھا جبکہ یہ دو میں سے دوسرے تھے، جب دونوں غار میں تھے

اس آیتِ کریمہ میں صحابۂ کرام رَضِیَ اللہُ عنہم کو دِین کی خِدْمت کرنے، رسولِ ذیشان  صَلَّی اللہُ عَلَیْہِ وَ آلِہٖ وَ سَلَّم  کی خِدْمت کے لئے تَن، مَن، دھن کی بازی لگا دینے کی ترغیب دِلائی گئی ہے، اس رغبت دِلانے کا انداز دیکھئے کیسا نِرالا ہے، فرمایا:

اِلَّا تَنْصُرُوْهُ فَقَدْ نَصَرَهُ اللّٰهُ (پارہ:10، سورۂ توبہ:40)

تَرْجمۂ کَنْزُالعِرْفان:اگر تم اس (نبی) کی مدد نہیں کرو گے تو اللہ ان کی مدد فرماچکا ہے

یعنی اے میرے مَحْبُوب  صَلَّی اللہُ عَلَیْہِ وَ آلِہٖ وَ سَلَّم  صحابہ! اگر تم ہمارے مَحْبُوب  صَلَّی اللہُ عَلَیْہِ وَ آلِہٖ وَ سَلَّم  کی مدد، ان کی خِدْمت اور ان کے لئے جاں نثاری کا مظاہرہ نہیں کرو گے تو یاد رکھو...! تم میں سے کوئی بھی نہ ہو، ہمارے مَحْبُوب  صَلَّی اللہُ عَلَیْہِ وَ آلِہٖ وَ سَلَّم  کی خِدْمت کے لئے، ان پر جان لُٹانے، تَن، مَن، دَھن کی بازی لگا دینے کے لئے صِرْف ایک صِدِّیق ہی کافی ہے۔^([1])

کر دیا سب کچھ نچھاور شاہ پر                                                                            باکمال و باوفا صدیق ہیں

                   پیارے اسلامی بھائیو! معلوم ہوا؛ دِین کی جیسی خِدْمَت، محبوبِ ذیشان، مکی مدنی سلطان  صَلَّی اللہُ عَلَیْہِ وَ آلِہٖ وَ سَلَّم  کے لئے جیسی قربانیاں حضرت صِدِّیقِ اکبر رَضِیَ اللہُ عنہ نے پیش کی ہیں، ایسی کوئی اور نہیں کر سکا، اسی لئے تو اللہ پاک ان کی مثال دے کر فرماتا ہے: اگر ہمارے محبوب  صَلَّی اللہُ عَلَیْہِ وَ آلِہٖ وَ سَلَّم  کا کوئی خادِم بھی نہ ہو، ان کی خِدْمت کے لئے ایک صِدِّیق ہی کافی ہے۔