Book Name:Shab e Meraj Aur Deedar e Ilahi
حُضُور حاضِر ہو جائیں۔ یہ کیسی عظیم نعمت ہے جو ہمیں مِعْراج کے صدقے میں نصیب ہوئی، یہ کیسی عظیم نوازش ہے جو حُضُور پُرنور ، جانِ کائنات صَلَّی اللہُ تَعَالٰی عَلَیْہِ وَاٰلِہٖ وَسَلَّمَ کے صدقے ہم گنہگاروں پر ہوئی۔ سُبْحٰنَ اللہ!
حُضُور داتا گنج بخش علی ہجویری رَحْمَۃُ اللہِ تَعَالٰی عَلَیْہِ فرماتے ہیں:رسولِ اکرم، نورِ مُجَسَّم صَلَّی اللہُ تَعَالٰی عَلَیْہِ وَاٰلِہٖ وَسَلَّمَ کو جب مِعْراج میں لے جایا گیا اور مَقامِ قُرب سے سَرفراز کیا گیا تو آپ صَلَّی اللہُ تَعَالٰی عَلَیْہِ وَاٰلِہٖ وَسَلَّمَ نے اللہ پاک کی بارگاہ میں عَرض کیا: یا اللہ پاک! اب مجھے بلاؤں کے گھر (یعنی دُنیا میں) واپس مَت بھیج۔ اللہ پاک نے فرمایا: اے محبوب! ہمارا حکم ایسا ہی ہے، آپ دُنیا میں واپس جائیے تاکہ آپ کے ذریعے شریعت قائِم ہو اور جو کچھ ہم نے یہاں عطا فرمایا ہے، دُنیا میں بھی عنایت فرمائیں گے۔ چُنانچہ جب آپ صَلَّی اللہُ تَعَالٰی عَلَیْہِ وَاٰلِہٖ وَسَلَّمَ دُنیا میں تشریف لائے تو جب بھی آپ کا دِل اُس مَقامِ بلند کا مُشتاق ہوتا تو فرماتے: اَرِحْنَا یَا بِلَالُ بِالصَّلَاۃِ اے بلال! نماز کی اَذان دے کر ہمیں راحت پہنچاؤ...!
داتا حُضُور مَزید فرماتے ہیں: ہمارے پیارے نبی، رسولِ ہاشمی صَلَّی اللہُ تَعَالٰی عَلَیْہِ وَاٰلِہٖ وَسَلَّمَ کی ہر نماز مِعْراج ہوتی، آپ صَلَّی اللہُ تَعَالٰی عَلَیْہِ وَاٰلِہٖ وَسَلَّمَ اللہ پاک کی مہربانیوں کو نماز میں دیکھتے، آپ کی رُوح مُبارک نماز میں ہوتی، دِل مُبارک نیاز میں ہوتا اور باطِن راز میں ہوتا تھا۔ یہاں تک کہ آپ صَلَّی اللہُ تَعَالٰی عَلَیْہِ وَاٰلِہٖ وَسَلَّمَ کی آنکھوں کی ٹھنڈک نماز بن گئی۔ ([1])
ہر عبادت سے بَرتَر عبادت نَماز ساری دولت سے بڑھ کر ہے دولت نَماز