قلبِ غمگیں کا سامانِ فَرحت نَماز            ہے مریضوں کو پیغامِ صِحَّت نَماز

پیارے آقا کی آنکھوں کی ٹھنڈک ہے یہ قلبِ شاہِ مدینہ کی راحت نَماز

بھائیو! گر خُدا کی رِضا چاہئے                   آپ پڑھتے رہیں باجماعت نَماز

صَلُّوْا عَلَی الْحَبیب!                                               صَلَّی اللّٰہُ عَلٰی مُحَمَّد

نماز اوریادِ مِعْراج

پیارے اسلامی بھائیو! نماز تحفۂ مِعْراج بھی ہے، مُؤمن کے حق میں مِعْراج بھی ہے اور اس پیاری پیاری عِبَادت یعنی نماز میں مِعْراجِ مصطفےٰ  صَلَّی اللہُ تَعَالٰی عَلَیْہِ وَاٰلِہٖ وَسَلَّمَ کی یاد بھی رکھی گئی ہے۔ جی ہاں! عُلَمائے کرام فرماتے ہیں: مِعْراج کی رات ہمارے پیارے آقا، مدینے والے مصطفےٰ  صَلَّی اللہُ تَعَالٰی عَلَیْہِ وَاٰلِہٖ وَسَلَّمَ جب بارگاہِ رَبُّ العِزّت میں حاضِر ہوئے تو آپ نے عرض کیا: اَلتَّحِیَّاتُ لِلّٰہِ وَالصَّلَوٰتُ وَالطَّیِّبَاتُ (یعنی تمام قولی فعلی  اور مالی عبادتیں اللہ پاک ہی کے لئے ہیں) اللہ پاک نے اس کے جواب میں فرمایا: اَلسَّلَامُ عَلَیْكَ اَیُّھَا النَّبِیُّ وَ رَحْمَۃُ اﷲ ِوَبَرَکَاتُہٗ(سلام ہو آپ پر اے نبی! اور اللہ پاک کی رحمتیں اور برکتیں) ، اس پر رسولِ رحمت، شفیعِ اُمّت  صَلَّی اللہُ تَعَالٰی عَلَیْہِ وَاٰلِہٖ وَسَلَّمَ نے دوبارہ عَرض کیا:اَلسَّلَامُ عَلَیْنَا وَعَلیٰ عِبَادِ اﷲ الصَّالِحِیْنَ (سلام ہو ہم پر اور اللہ پاک کے نیک بندوں پر)۔ ^([1])

جب پیارے آقا، مکی مدنی مصطفےٰ  صَلَّی اللہُ تَعَالٰی عَلَیْہِ وَاٰلِہٖ وَسَلَّمَ مِعْراج سے واپس تشریف لائے تو آپ  صَلَّی اللہُ تَعَالٰی عَلَیْہِ وَاٰلِہٖ وَسَلَّمَ نے اُمّت کو اَلتَّحِیَّات کی تعلیم دی اور اس میں یہی مُبارک کلمات سکھائے، گویا آپ  صَلَّی اللہُ تَعَالٰی عَلَیْہِ وَاٰلِہٖ وَسَلَّمَ نے فرمایا: اے لوگو!نماز تمہاری مِعْراج ہے تو میں مِعْراج میں ربّ کریم سے جو گفتگو کر کے آیا ہوں تم بھی نماز میں و ہی کیا کرو ۔^([2])