Baap Ki Narazi Ka Nuqsan

باتوں سے خوشبو آئے

ناپسندیدہ شخص

(1)ارشادِ حضرت سیِّدُنا عبداللہ بن مسعود رضی اللہ عنہ: میں اس بات کو ناپسند کرتا ہوں کہ کسی شخص کو فارغ دیکھوں جو نہ تو دُنیا کے کسی کام میں مصروف ہواور نہ ہی آخِرت کی تیاری کررہا ہو۔(حلیۃ الاولیاء،ج1،ص178،رقم:402)

عالم ِ دین کی تین خصلتیں

(2)ارشادِ حضرتِ سیِّدُنا ابو حازم رحمۃ اللہ علیہ:تم اس وقت تک عالِم نہیں بن سکتے جب تک تم تین چیزوں سے نہ بچو: (1)اپنے سے بڑے کی نافرمانی (2)اپنے سے چھوٹے کو حقیر جاننا اور(3)اپنے علم سے دنیا کمانا۔(حلیۃ الاولیاء،ج3،ص280،رقم:3964)

زیادہ کھانے کا نقصان

(3)ارشادِ حضرت سیّدُنا امام محمد غزالی رحمۃ اللہ علیہ: زیادہ کھانے سے اعضاء میں فِتنہ پیدا ہوتا اور فساد برپا کرنے اور بے ہُودہ کام کر گُزرنے کی رَغبت جَنَم لیتی ہے۔(منھاج العابدین، ص82)

چغل خور کافساد

(4)ارشادِ حضرتِ سیِّدُنایحییٰ بن ابوکثیر رحمۃ اللہ علیہ: چُغَل خورایک لمحے میں اتنا فساد برپا کر دیتا ہے جتنا جادو گر ایک مہینے میں نہیں کر سکتا۔ (حلیۃ الاولیاء ،ج3،ص82،رقم:3258)

احمد رضا کا تازہ گلستاں ہے آج بھی

عالمِ دین کی فضیلت

(1)جاہل عالم کی فضیلت کو نہیں پہنچ سکتا جبکہ وہ عالم ”عالمِ دین“ ہو۔(فتاویٰ رضویہ،ج23،ص686)

حُقوقُ العباد کیسے معاف ہوں؟

(2)تمام حُقوقُ العباد ایسے ہی ہیں کہ جب تک صاحبِ حق مُعاف نہ کرے معافی نہ ہوگی۔ (فتاویٰ رضویہ،ج24،ص372)

باپ کی ناراضی کا نقصان

(3) (آدمی) جب تک باپ کو راضی نہ کرے گا اس کا کوئی فرض، کوئی نفل، کوئی عملِ نیک اَصلاً (بالکل) قبول نہ ہوگا، عذابِ آخِرت کے علاوہ دنیا میں ہی جیتے جی سخت بلاء نازل ہوگی مرتے وقت مَعَاذَاﷲ کلمہ نصیب نہ ہونے کا خوف ہے۔(فتاویٰ رضویہ،ج24،ص384)

عطّار کا چمن، کتنا پیارا چمن

سَر دَرد کا ایک علاج

(1)اَبرُو یعنی بَھنووں پر تیل لگانا سنّت ہے اور اس سے سَر دَرد بھی دُور ہوتا ہے ۔(مَدَنی مذاکرہ، 25جمادی الاخریٰ1438ھ)

دنیوی معاملات میں شریعت پابندی

(2)ہمیں دنیاوی بھلائیاں حاصل کرنے کے لئے بھی وہی کام کرنا چاہئے جو عین شریعت کے مطابق ہو۔(مَدَنی مذاکرہ،4محرم الحرام1436ھ)

عُلَما میری برادری ہے