Bachon ko Junk Food se Bachaiye

ماں باپ کے نام

بچوں کو جنک فوڈ سے بچائیں

(Protect children from junk food)

*مولانا ظہوراحمددانش عطاری مدنی

ماہنامہ فیضانِ مدینہ اپریل 2025

آج کے دور میں بچّوں میں جنک فوڈ کی بڑھتی ہوئی عادت ایک سنگین مسئلہ بنتی جا رہی ہے۔ برگر، پیزا، چپس، کولا ڈرنکس اور دیگر غیر صحت بخش خوراک بچوں کی صحت پر منفی اثرات مرتب کر رہی ہے۔ والدین کے لئے ضروری ہے کہ وہ بچوں کو متوازن اور صحت مند خوراک کی طرف راغب کریں تاکہ ان کی جسمانی اور ذہنی نشوونما بہتر ہو۔

جنک فوڈ (Junk food)کے نقصانات

موٹاپا اور دیگر بیماریوں کا سبب:

زیادہ چکنائی، شوگر اور مصنوعی اجزاء پر مشتمل جنک فوڈ موٹاپے، دل کی بیماریوں، اور ذیابیطس کا باعث بن سکتا ہے۔

نظامِ ہاضمہ پر منفی اثرات:

جنک فوڈ میں فائبر کی کمی ہوتی ہے، جس کی وجہ سے بچوں کو قبض اور دیگر ہاضمے کے مسائل کا سامنا ہو سکتا ہے۔

ذہنی کارکردگی پر اثر:

غیر صحت مند خوراک ذہنی صلاحیتوں کو متأثر کرتی ہے، جس سے بچوں کی تعلیمی کارکردگی متأثر ہو سکتی ہے اور جنک فوڈ غیر صحت مند  ہونے کے علاوہ مضر صحت بھی ہے۔

جسمانی کمزوری:

جنک فوڈ میں ضروری وٹامنز اور منرلز کی کمی ہوتی ہے، جس کی وجہ سے بچوں میں کمزوری اور تھکن کی شکایت بڑھ جاتی ہے۔

مدافعتی نظام پر اثر:

غیر متوازن خوراک بچوں کے مدافعتی نظام کو کمزور کر دیتی ہے، جس سے وہ بار بار بیماریوں کا شکار ہو سکتے ہیں۔

ذہنی دباؤ اور بے چینی:

تحقیق سے ثابت ہوا ہے کہ جنک فوڈ زیادہ کھانے والے بچوں میں ذہنی دباؤ، بے چینی اور چِڑچِڑاپن زیادہ ہوتا ہے۔

بچوں کو جنک فوڈ (Junk food) سے دور رکھنے کے طریقے

جنک فوڈ  سے بچوں کو محفوظ رکھنے کا بہترین طریقہ یہ ہے کہ ان کے لئے مزیدار اور صحت بخش متبادل تیار کئے جائیں۔ تازہ پھلوں اور سبزیوں کو مختلف انداز میں پیش کریں۔گھر میں بنے ہوئے سینڈوچ، دہی، دودھ اور خشک میوہ جات کو بچوں کی خوراک کا حصہ بنائیں۔صحت مند اسنیکس جیسے چنے، مکئی یا بھنے ہوئے بادام فراہم کریں۔بچوں کو صحت مند جوس اور اسموتھیز پینے کی ترغیب دیں۔بازار کے چپس کی جگہ گھر میں آلو یا مکئی کے چپس تیار کریں۔بچوں کو شہد، کھجور اور قدرتی مٹھاس والے اسنیکس کھانے کی عادت ڈالیں۔

بچوں کو اچھے کھانے کے فوائد سمجھائیں:

بچوں کو یہ بتائیں کہ جنک فوڈ کیوں نقصان دہ ہے اور صحت بخش کھانے کے کیا فوائد ہیں۔ اگر بچوں کو سمجھایا جائے کہ تازہ خوراک کس طرح ان کی توانائی اور ذہانت میں اضافہ کرتی ہے، تو وہ خود بھی  اچھا کھانا کھانے کی طرف راغب ہوں گے۔

کھانے کی وقت بندی کا خیال رکھیں:

بچوں کو وقت پر ناشتہ، دوپہر اور رات کا کھانا کھلائیں تاکہ انہیں بار بار غیر صحت بخش چیزیں کھانے کی عادت نہ پڑے۔ بھوک مٹانے کے لئے فوری دستیاب جنک فوڈ کے بجائے متوازن خوراک دی جائے۔

گھر میں کھانے کو دلچسپ بنائیں:

بچوں کو گھر میں تیار کردہ کھانوں کی طرف متوجہ کرنے کے لئے کھانے کو دلچسپ اور مزیدار بنائیں۔ اگر کھانے کی شکل اور انداز دلکش ہو، تو بچے خوشی سے اسے کھائیں گے۔ مثال کے طور پر، رنگین سبزیوں کا سلاد، فروٹ اسموتھیز یا گھر میں بنے صحت مند برگر تیار کئے جا سکتے ہیں۔

فاسٹ فوڈ کے استعمال کو محدود کریں:

اگر بچے فاسٹ فوڈ کے عادی ہو چکے ہیں تو اچانک روکنے کے بجائے آہستہ آہستہ اس کا استعمال کم کریں اور اسے صحت مند متبادل سے بدلیں۔ ہفتے میں ایک دن گھر میں بچوں کی پسند کا کوئی صحت مند کھانا بنا کر دیا جا سکتا ہے تاکہ ان کی خواہش پوری ہو جائے اور صحت بھی برقرار رہے۔

بچوں کو جسمانی سرگرمیوں میں مشغول کریں:

بچوں کو کھیل کود، سائیکلنگ، یا کسی بھی جسمانی سرگرمی میں مشغول رکھیں تاکہ وہ زیادہ توانائی خرچ کریں اور صحت مند طرزِ زندگی اپنائیں۔

والدین خود مثال بنیں:

اگر والدین خود جنک فوڈ سے گریز کریں اور صحت مند کھانے کو ترجیح دیں، تو بچے بھی ان کی پیروی کریں گے۔ بچے وہی سیکھتے ہیں جو وہ اپنے والدین کو کرتے دیکھتے ہیں۔

تعلیمی اداروں میں آگاہی پروگرام منعقد کریں:

بچوں کو صحت مند کھانے کی طرف راغب کرنے کے لئے اسکولوں میں آگاہی سیشنز اور ورک شاپس منعقد کئے جائیں تاکہ وہ خود بھی بہتر غذائی عادات اپنائیں۔

بچوں کو کھانے میں شامل کریں:

بچوں کو کھانے کی تیاری میں شامل کریں تاکہ وہ صحت مند کھانوں میں دلچسپی لیں اور ان کے فوائد کو سمجھ سکیں۔

جنک فوڈ کی تشہیر سے ہوشیار رہیں:

ٹی وی اور سوشل میڈیا پر جنک فوڈ کے اشتہارات بچوں کی توجہ اپنی طرف کھینچتے ہیں۔ والدین کو چاہئےکہ وہ بچوں کو ان اشتہارات کے نقصانات سے آگاہ کریں اور انہیں صحت بخش کھانے کے فوائد سمجھائیں کیا ہی اچھا ہو کہ گھر میں صرف  مدنی چینل ہی چلایا جائے تاکہ مسائل کی جڑ ہی کٹ جائے۔  اَلحمدُلِلّٰہ! مدنی چینل پر کسی بھی قسم کے اشتہارات نہیں دکھائے جاتے۔

قارئین!بچوں کو جنک فوڈ سے بچانے کے لئے والدین کو خود بھی محتاط رویہ اپنانا ہوگا۔ صحت بخش خوراک کے ذریعے بچوں کی جسمانی اور ذہنی صحت کو بہتر بنایا جا سکتا ہے۔ متوازن خوراک، دلچسپ گھریلو کھانے اور مثبت عادات کے فروغ سے بچوں کی صحت کو محفوظ بنایا جا سکتا ہے۔ اس سلسلے میں والدین کی توجہ اور محبت سب سے اہم کردار ادا کرتی ہے۔ صحت مند بچوں کا مستقبل روشن اور کامیاب ہوگا۔

ــــــــــــــــــــــــــــــــــــــــــــــــــــــــــــــــــــــــــــــ

* مدنی چینل فیضان مدینہ، کراچی